Një nga kafenetë më të shtrenjta në botë kalon fillimisht nga barku i një kafshe. Por tani, shkencëtarët po përpiqen ta prodhojnë pa përdorur më kafshët fare.
Kafja më e çuditshme në botë
Ajo quhet Kopi Luwak, ose ndryshe “kafja e civetës”, dhe është kthyer në simbol luksi në kafene dhe rrjete sociale.
Në Instagram gjenden mbi 20 mijë postime me etiketën #civetcoffee, ku njerëzit tregojnë me krenari gotat e tyre me këtë pije të veçantë.
Por pas shijes së saj të butë e aromës së veçantë fshihet një histori më pak glamuroze: kokrrat e kafesë kalojnë përmes sistemit tretës të një kafshe tropikale të quajtur civet aziatik, për t’u mbledhur më pas nga jashtëqitjet e saj.
Një kilogram i kësaj kafeje mund të kushtojë mbi 12 000 korona norvegjeze (rreth 1 000 euro).
Pas luksit – vuajtja e kafshëve
Organizatat për mbrojtjen e kafshëve kanë ngritur disa herë alarmin: mijëra civeta mbahen në kafaze të ngushta dhe ushqehen me detyrim për të prodhuar më shumë kafe.
Por një grup shkencëtarësh në Indi thotë se kjo mund të marrë fund.
Kafja që fermentohet në zorrë
Një ekip zoologësh, i udhëhequr nga profesori Palatty Allesh Sinu në Universitetin Qendror të Keralës, mblodhi kokrra kafeje nga jashtëqitjet e civetave të egra në malet Western Ghats.
Në këto zona, kafshët dhe fermerët e kafesë bashkëjetojnë pa konflikte dhe pa robëri.
Studimi tregoi se kokrrat që kalojnë përmes civetës kanë më shumë yndyrë, më pak kafeinë dhe më pak aciditet – një kombinim që, sipas ekspertëve, u jep atyre shijen më të butë dhe të rrumbullakët që adhuruesit e kafesë e vlerësojnë.
Shkencëtarët besojnë se ky efekt vjen nga fermentimi natyral në zorrët e kafshës, dhe po përpiqen të kuptojnë cilët enzima e shkaktojnë atë proces.
Kafe civete… pa civeta
Qëllimi përfundimtar i studiuesve është të riprodhojnë shijen e Kopi Luwak pa përdorur kafshë.
“Nëse zbulojmë se cilët enzima janë përfshirë, mund të bëjmë kafenë civete pa civeta,” – thotë profesori Sinu.
Nëse ja dalin, bota mund të shijojë së shpejti një nga kafenetë më të shtrenjta dhe më të famshme, por pa vuajtjen e kafshëve.