Polonia arrestoi një gazetar spanjoll me dyshimin se ishte një spiun rus. Ai po planifikonte “të shkonte në Ukrainë për të vazhduar aktivitetin e tij”, tha të premten Agjencia e Sigurisë së Brendshme.
I dyshuari, i identifikuar si një agjent i agjencisë së inteligjencës ushtarake të Rusisë (GRU), gazetari Pablo Gonzales u arrestua në Przemysl, afër kufirit të Polonisë me Ukrainën.
Në shënimin e publikuar nga policia polake thuhej se ai ishte me origjinë ruse.
Sipas të njëjtave burime ai kishte kryer operacione në favor të Rusisë nëpër Evropë dhe gjetkë nën mbulesën e të qenit gazetar.
Avokati i tij, i tha Reuters se nuk kishte arritur ende të kontaktonte klientin e tij. Ai postoi më herët në Twitter se klienti i tij ishte akuzuar për spiunazh dhe po mbahej në burgun Rzeszow.
Ministria e Jashtme e Spanjës tha se ishte informuar nga autoritetet polake për akuzat, por nuk mund të jepte asnjë detaj. Ajo tha se do të ofronte ndihmë konsullore.