Moska rrezikon luftë direkte me NATO-n, për shkak të përpjekjeve të saj për të kontrolluar anijet në ujërat ndërkombëtare dhe për të mbytur ekonominë ukrainase.
Ish-komandanti suprem i NATO-s për Evropën, James Stavridis, i cili udhëhoqi forcat e aleancës në kontinent midis 2009 dhe 2013, thotë se “veprimet e Rusisë në ujërat ndërkombëtare të Detit të Zi përbëjnë një rrezik real për ta përshkallëzuar këtë në një luftë në det midis NATO-s dhe Federatës Ruse”.
Sipas tij, NATO nuk do ta furnizojë me armë dhe para Ukrainën, për ta parë ekonominë e saj të mbytet nga bllokada ruse.
Ministria ruse e Mbrojtjes njoftoi të martën se kishte përdorur të shtënat paralajmëruese për të ndaluar një anije mallrash që po lundronte drejt Odesës. Ministri i Jashtëm ukrainas tha se anija ishte turke, ndërsa inspektimi rus ndodhi në jugperëndim të Detit të Zi, në brigjet e Turqisë, një peshë e rëndë e NATO-s. Stavridis e quajti këtë taktikë “të barasvlefshme me piraterinë“. Sipas tij, Kremlini po përpiqet të minojë tregtinë midis Ukrainës dhe pjesës tjetër të Evropës.
“Nëse Rusia fillon të kapë anije ose kërkon t’i trembë ato, mendoj se ka të ngjarë që NATO të përgjigjet duke mbështetur një korridor humanitar për transportin detar,” tha Stavridis. Aleanca mund të mbrojë anijet që shkojnë në dhe nga porti ukrainas i Odesës “me avionë luftarakë të NATO-s lart dhe ndoshta anije luftarake të NATO-s në përcjellje“.
Tensionet në Detin e Zi janë përshkallëzuar që kur Rusia u tërhoq në mënyrë të njëanshme nga marrëveshja e grurit në korrik dhe paralajmëroi se anijet që udhëtonin në portet e Ukrainës mund të shiheshin si objektiva ushtarakë. Ukraina u kundërpërgjigj duke vënë në shënjestër eksportet ruse të energjisë me një sulm detar me dron mbi një cisternë. Kievi i shpalli ujërat rreth porteve ruse të Detit të Zi “zonë me rrezik lufte“.