Ministri i Jashtëm gjerman Heiko Maas dhe homologu i tij nga Luksemburgu, Jean Asselborn festuan rihapjen e kufirit midis dy vendeve të Shtunën në një takim simbolik në Urën e Shengenit. Maas tha se kjo ishte një shenjë që zona e Shengenit, zona pa pasaporta ku 26 vende europiane kanë hequr kufijtë e brendshëm, po kthehej dhe ai theksoi rëndësinë e një “Europe pa kufij”.
Asselborn shtoi se ky veprim demonstron se “Shengeni nuk u mposht nga virusi, që Shengeni po kthehet në jetë dhe ky është një hap shumë i rëndësishëm”. Një relaksim i mbikëqyrjes së kufijve midis Zvicrës dhe Gjermanisë u zbatua gjithashtu të premten në mbrëmje. Gardhet në kufi u çmontuan pas katër javësh bllokim të qarkullimit midis dy vendeve.
Frika ishte se lëvizja e lirë brenda BE nuk do të kthehej për një kohë të gjatë pasi vendet e ndryshme anëtare vendosën kufizime të rrepta kufitare kur COVID-19 goditi Europën. Por Gjermania planifikon të rihapë gradualisht kufijtë e saj të brendshëm gjatë muajit tjetër. Më 15 qershor kufijtë e saj me Austrinë, Zvicrën dhe Francën do të kthehen në normalitet.
Një zëdhënës i ministrisë së brendshme gjermane njoftoi të Premten se qytetarët e BE-së të cilëve u lejohet të hyjnë në Gjermani së shpejti do të jenë në gjendje ta bëjnë këtë pa një karantinë dy-javore. Masa tashmë vlen në North Rhine-Westphalia, shteti më i populluar i Gjermanisë që ndan një kufi me Belgjikën dhe Holandën. Shtetet e tjera pritet të ndjekin të njëjtën gjë në ditët në vijim.
Shkalla e rasteve të reja dhe e viktimave është ulur në mënyrë të vazhdueshme që nga fundi i Marsit në ekonominë më të madhe të Europës dhe ka vetëm 15,000 raste të njohura aktive të COVID-19 në vend.(Euronews)