Arabia Saudite ka deklaruar ndërprerjen e financimeve për ndërtimin e xhamive jashtë territorit të saj. Lajmin e ka përcjellë një media në gjuhën arabe, arabi21.com, që citon ish-ministrin saudit të Drejtësisë, Mohammed Bin Abdul-Karim Issa. Middle East Monitor referon nga ana e vet gazetën zvicerane, Le Matin Dimanche, që shkruan se Arabia Saudite do të krijojë këshilla lokalë për çdo xhami, në bashkëpunim me autoritetet lokale të vendeve përkatëse në mënyrë që të dorëzojë këto xhami “në duar të sigurta”.
Ka ardhur koha që të dorëzojmë xhaminë e Gjenevës te një këshill administrativ zviceran që përfaëson myslimanët e zonës. Do të ketë edhe një klerik të zgjedhur, citohet të jetë shprehur ish-ministri.
Sipas tij një veprim i tillë do të ndiqet për të gjitha xhamitë në mbarë botën, të cilat janë financuar, apo janë nën kontrollin e saj. Ish-ministri ka sjellë arsye të sigurisë për këtë vendim të Riadit.
Zyrtari saudit ishte në Auschwitz, në krye të një delegacioni që mori pjesë në përkujtimin e 75-vjetorit të çlirimit të kampit ku ka nderuar viktimat hebreje. Sinjalizohet kështu një ndryshim kursi nga Arabia Saudite e cila deri më sot ka ndjekur politikë më konservatore.
Duhet thënë se problemi i xhamive jashtë kontrollit është i pranishëm edhe në Shqipëri, në Kosovë e në Maqedoni. Nuk ka shifra zyrtare por mendohet se vetëm në Shqiperi janë disa dhjetëra xhami (89 numri i fundit i raportuar) që nuk kontrollohen nga Komuniteti Mysliman i Shqipërisë.
Të mos flasim pastaj edhe për Kishat dhe objektet tjera fetare, që po ashtu janë jashtë kontrrolit të komuniteteve fetare të vendeve përkatëse.