Bruce Springsteen i ka shitur të gjithë katalogun e këngëve të tij kompanisë Sony Music për 500 milionë dollarë. Shitja, e cila përfshin punën e regjistruar dhe shkrimin e këngëve të tij, do t’i japë Sony pronësinë e një prej veprave më të admiruara në pop dhe rock: mbi 300 këngë që përfshijnë 20 albume në studio plus publikime të tjera, raporton Rolling Stones.
Kjo marrëveshje tejkalon atë të Bob Dylan në 2020, i cili ia shiti katalogun e këngëve të tij studios Universal, për 300 milionë dollarë.
Shumë artistë të tjerë kanë shitur të drejtat për punën e tyre në dy vitet e fundit, mes të cilëve Lindsey Buckingham, Stevie Nicks dhe Christine McVie nga Fleetwood Mac; Paul Simon, Tina Turner, Shakira dhe Red Hot Chili Peppers. Në nëntor u raportua se po përgatitej një shitje e katalogut të David Bowie për rreth 200 milionë dollarë.
Marrëveshjet të kësaj natyre po bëhen gjithnjë e më të shpeshta ndërsa tregu i transmetimit konsolidohet dhe fillon të gjenerojë pagesa të konsiderueshme dhe të vazhdueshme për autorët e këngëve dhe interpretuesit. Katalogët e këngëve janë shumë të rëndësishëm sepse këngët mund të sinkronizohen me reklamat, ose me kolonat zanore të televizionit dhe filmave, për të gjeneruar të ardhura të mëtejshme.
Ndërsa muzikantët potencialisht mund të fitojnë më shumë para në afat të gjatë duke mbajtur të drejtat e tyre të këngës, një marrëveshje e tillë përsa kohë janë ende gjallë është një perspektivë tërheqëse.
Artistët në disa raste kanë lidhje të gjata me kompanitë të cilave u shesin: në rastin e Springsteen, ka qenë Columbia Records në pronësi të Sony që nga albumi i tij debutues në 1973.