Hipokrizia e Grenellit mbi protestat studentore në Serbi
Reagimi i ish-emisarit të Donald Trump për dialogun Kosovë-Serbi, Richard Grenell, mbi protestat studentore në Serbi ka ngjallur polemika dhe kritika të ashpra nga qytetarët dhe analistët politikë. Grenell, i njohur si “buldozeri i Trump-it”, bëri një koment që shumë e konsideruan si hipokrit, duke kërkuar që protestuesit të shmangnin dhunën dhe të respektonin procesin demokratik, ndërkohë që ai vetë ka qenë i heshtur për trazirat në Kapitol më 6 janar 2021.
Deklarata e Grenellit dhe reagimet nga Serbia
Në një postim në platformën X (ish-Twitter), Grenell theksoi rëndësinë e protestave paqësore, duke thënë:
“Është gjithmonë e rëndësishme të ngresh zërin dhe të dëgjohesh. Por të gjithë duhet të dënojnë dhunën dhe të qëndrojnë tek demonstratat paqësore. Procesi demokratik duhet të respektohet. Ne nuk mbështesim ata që minojnë sundimin e ligjit apo që marrin godinat qeveritare me forcë. Nëse nuk të pëlqen një ligj apo një lider, puno për ta ndryshuar atë – por mos përdor dhunë.”
Megjithatë, përdoruesit serbë të rrjeteve sociale iu përgjigjën menjëherë duke i dhënë kontekstin e plotë të situatës. Ata sqaruan se protestat studentore ishin ndër më paqësoret në Serbi gjatë 30 viteve të fundit dhe se e vetmja dhunë e shfaqur ishte e orkestruar nga mbështetësit e regjimit të Aleksandar Vuçiqit. Ata gjithashtu theksuan se kërkesat e protestuesve nuk kishin të bënin me përmbysjen e qeverisë, por me drejtësinë për viktimat e një aksidenti tragjik ku humbën jetën 15 persona.
Një kujtesë për Kapitolin
Një nga pikat më të mëdha të kritikave ndaj Grenellit është qëndrimi i tij ndaj trazirave të 6 janarit 2021 në SHBA, kur mbështetësit e Trump-it sulmuan ndërtesën e Kongresit amerikan në një përpjekje për të penguar certifikimin e fitores së Joe Biden. Gjatë këtij sulmi, pesë persona humbën jetën, mbi 170 policë u plagosën, dhe dëmet materiale kapën mbi 2.7 milionë dollarë.
Pavarësisht kësaj, Grenell asnjëherë nuk e ka dënuar hapur këtë sulm. Në një intervistë për CNN në maj 2021, ai e minimizoi incidentin duke e quajtur “një trazirë të keqe”, ndërsa në janar 2022, në një dalje për Newsmax, sugjeroi se problemi më i madh i 6 janarit ishte fakti që Trump u ndalua nga Twitter-i, duke shmangur çdo kritikë për dhunën.
Qëndrimi i Grenellit – interes apo parim?
Ish-diplomati serb Srećko Đukić ka vënë në dukje këtë hipokrizi, duke thënë për Nova.rs se Grenell ka “kujtesë të shkurtër”. Ai theksoi se mbështetësit e Trump sulmuan dhe morën nën kontroll Kongresin amerikan, ndërsa studentët serbë nuk kanë përdorur dhunë dhe nuk kanë synuar marrjen e institucioneve shtetërore.
“Është e qartë që Grenell ka ngatërruar gjërat dhe është nxituar të ndihmojë sponsorët e tij në mënyrë jo parimore,” tha Đukić.
Në këtë kontekst, deklarata e Grenellit nuk duket të jetë një thirrje e sinqertë për demokraci dhe paqe, por një përpjekje për të mbështetur qeverinë aktuale serbe dhe interesat e tij personale. Qëndrimi i tij selektiv ndaj protestave dhe dhunës tregon një hipokrizi të thellë, duke ngritur pyetje mbi motivet e tij të vërteta në rajon. /Nova.rs/ Perktheu dhe përshtati MekuliPress)