As këtë vit nuk do të ketë festime për ndarjen e çmimeve “Nobel”, ndërkohë që laureatët do t’i pranojnë medaljet dhe diplomat nga shtetet e tyre, ka bërë të ditur të enjten Fondacioni Nobel.
Festimet tradicionale nuk janë mbajtur as vitin e kaluar për shkak të pandemisë me COVID-19.
“Mendoj se secili do të dëshironte që pandemia me COVID-19 të përfundonte, mirëpo ende nuk jemi te fundi”, ka thënë Fondacioni Nobel përmes një deklarate.
Sipas Fondacionit, ndarja e çmimeve do të transmetohet në televizion dhe përmes platformës digjitale të çmimeve “Nobel”.
Ndërkohë, Komiteti norvegjez i Nobelit është duke e lënë të hapur mundësinë e ndarjes së shpërblimit “Nobel për Paqe”, përmes një ngjarjeje personale.
Vitin e kaluar çmimin “Nobel për Paqe” e ka fituar Programi Botëror i Ushqimit, në një ceremoni virtuale.
Këtë vit, çmimet “Nobel” do të shpërndahen për mjekësi, fizikë, kimi, letërsi, paqe dhe ekonomi.
Çmimet do të bëhen të ditura nga 4 deri më 11 tetor.