Nga MekuliPress
Nëse besoni te gazetaria e pavarur, na mbështetni sot me një "kafe" simbolike. Çdo kontribut na ndihmon ta mbajmë Mekuli Press të lirë, të pavarur dhe pa asnjë ndikim.
☕ Kliko dhe mbështete MekuliPress. Ruaje të vërtetën shqiptare.Ka histori që nuk harrohen sepse tregojnë sa e rrezikshme mund të jetë ndonjëherë thjesht të duash dikë.
Kjo ishte jeta e Olga Ivinskayës.
E lindur më 1912, me dy martesa të thyera nga tragjedia- një burrë të vetëvrarë dhe tjetrin të vrarë në luftë – Olga mbeti nënë e dy fëmijëve dhe punonte si redaktore në revistën prestigjioze «Novy Mir».
Dhe pikërisht aty, në tetor 1946, në zyrën e saj hyri Boris Pasternaku.
Ai ishte tashmë shkrimtar i njohur, njeri me një ndjeshmëri të jashtëzakonshme, por edhe burrë i martuar, me grua dhe dy djem.
Jeta e tij familjare ishte e rregullt, e qetë, e vendosur.
Por brenda tij kishte një boshllëk që askush nuk e mbushte- derisa u shfaq Olga.
Mes tyre lindi një lidhje e heshtur, e thellë, e padeklaruar, por e pamohueshme.
Ajo u bë lexuesja e parë e dorëshkrimeve të tij, kritika më e sinqertë, gruaja që e kuptonte përpara se ta thoshte.
Dhe ajo u bë frymëzimi i «Lara»-s në «Doktor Zhivago».
Kur romani u refuzua në Bashkimin Sovjetik dhe filloi të qarkullonte jashtë vendit, regjimi u alarmua.
Ata e dinin se Pasternaku ishte shumë i famshëm për t’u prekur, por jo Olga.
Ajo u arrestua nën akuzë politike të fabrikuar, një frazë që regjimi e përdorte për të zhdukur këdo që nuk i nënshtrohej.
Madje në dosje e quajtën «komplize e një spioni» – absurditet i pastër, por i mjaftueshëm për ta futur në Gulag.
U dënua me pesë vjet kamp pune në Potma.
Dimra të akullt. Punë të rëndë. Uri. Izolim.
Por ajo nuk u thye.
Nuk e tradhtoi. Nuk përmendi emrin e tij. Nuk dha asnjë njeri.
Pasternaku, ndërkohë, e jetonte fajin çdo ditë.
Në letrat për miqtë pranonte se persekutimi i Olgës kishte ndodhur «për shkakun tim».
Dhe kur fitoi Çmimin Nobel në 1958, regjimi e kërcënoi drejtpërdrejt.
I frikësuar se çdo hap i tij mund ta dëmtonte sërish Olgën, ai u detyrua ta refuzonte çmimin më të madh të jetës së tij.
Olga u lirua pas vdekjes së Stalinit – heshturazi, pa asnjë pranim faji nga shteti.
Vite më vonë, më 1988, ajo u «rehabilitua», duke vërtetuar zyrtarisht se dënimi i saj kishte qenë i padrejtë.
Ajo u kthye nga Gulagu e thinjur para kohe, e lodhur, e sëmurë, por jo e thyer.
Ai vdiq pak vite më vonë, me mall, me pendim dhe me një dashuri që s’u shua kurrë.
Dhe kur arkivat u hapën, bota mësoi të vërtetën që regjimi e kishte fshehur për dekada: «Lara» e «Doktor Zhivago»-s nuk ishte trillim.
Ishte Olga Ivinskaya- gruaja që mbijetoi burgun, censurën dhe dashurinë e një shkrimtari të martuar, i cili nuk arriti ta shpëtojë.
