CEO i Tesla Musk sugjeron se në kohë inflacioni të lartë, është “në përgjithësi më mirë të zotërosh gjëra fizike si një shtëpi ose aksione në kompani që mendon se prodhojnë produkte të mira”, në vend që t’i mbash paratë cash.
Gjysma e dytë e postimit të tij në Twitter përputhet me këshillat për investime që Buffett, CEO i Berkshire Hathaway, ka dhënë në të kaluarën. Në vitin 2009, në fund të Recesionit të Madh, Buffett tha në mbledhjen vjetore të aksionerëve të kompanisë se një nga mënyrat më të mira për t’u mbrojtur nga inflacioni është të zotërosh një pjesë të “një biznesi të mrekullueshëm”.
Kjo sepse pavarësisht se çfarë ndodh me vlerën e dollarit, produkti i biznesit do të jetë ende i kërkuar. Inflacioni ka qenë në rritje të vazhdueshme gjatë gjithë dimrit. Sa më e lartë të jetë norma e inflacionit, aq më shpejt paratë e gatshme humbasin vlerën. Investimet, nga ana tjetër, përgjithësisht rriten me kalimin e kohës. Kjo është arsyeja pse gjatë periudhave të inflacionit të lartë, Musk dhe Buffett të dy rekomandojnë investimin në kompani të forta, aksionet e të cilave ka të ngjarë të qëndrojnë të qëndrueshme.
Megjithatë, është e rëndësishme të mbani mend se blerja e aksioneve mund të jetë e rrezikshme, dhe edhe nëse një kompani performon mirë në të kaluarën, nuk ka asnjë garanci që aksionet e saj do të rriten në të ardhmen.
Në vend të kësaj, shumë ekspertë, përfshirë Buffett, rekomandojnë investimin në fondet e indeksit me kosto të ulët, të cilat janë më pak të paqëndrueshme, por megjithatë përfitojnë nga rritja e tregut. Dhe për shkak se këto fonde mbajnë çdo aksion në një indeks, ato diversifikohen automatikisht.
Në fakt, S&P 500, i cili përfshin kompani si Amazon, Apple dhe Microsoft, ka tejkaluar inflacionin gjatë viteve. “Blini vazhdimisht një fond të indeksit me kosto të ulët S&P 500,” tha Buffett në 2017.
Edel Strazimiri / SCAN