Ndërsa Europa po përpiqet të reduktojë varësinë nga gazi rus, Gjermania ka qenë më e rezervuar në këtë drejtim. Megjithatë, ministri i Ekonomisë, Robert Habeck u kërkoi qytetarëve gjermanë të fillojnë të kursejnë energjinë.
Gjermania është nën presion për t’u shkëputur nga furnizimi me gaz dhe naftë ruse, pasi kritikët thonë se të ardhurat i japin Moskës fonde jetike për të çuar përpara luftën.
Habeck u sugjeroi gjermanëve të përdorin trenin ose biçikletën në vend të makinës.
“Unë kërkoj nga të gjithë të japin kontribut në kursimin e energjisë tani”, tha Habeck në një intervistë me Funke Media Group.
Ndërsa koalicioni i tij të ri qeveritar heziton të përdorë masat e detyrueshme të kursimit të energjisë, siç është kufizimi i shpejtësisë në autostradë, Habeck u është drejtuar apeleve.
“Është një kontribut për ta bërë më të lehtë largimin nga furnizimet ruse me energji. Ne po mbrojmë edhe klimën”, shtoi ai.
Thirrjet e Habeck për të kursyer gazin vijnë pasi deklarata të ngjashme u bënë nga kreu i agjencisë federale të rrjetit, i cili së fundmi u bë administrues i besuar i Gazprom Germania pas shtetëzimit të tij dhe është përgjegjës për sigurimin e furnizimit me gaz.
“Nga pikëpamja e niveleve të ruajtjes, duhet të them qartë: Të gjithëve u kërkohet të kontribuojnë në kursimin e gazit edhe sot”, tha Klaus Müller.