Interi është duke biseduar me Parmën për transferimin e sulmuesit Gervinho.
Dy skuadrat e mëdha italiane ishin në bisedime për lojtarin edhe në ditët e fundit të afatit kalimtar veror.
Por marrëveshja mes palëve nuk është arritur për shkak të kohës së paktë që kishin në dispozicion.
Megjithatë mediat italiane kanë raportuar se transferimi i Gervinhos te Interi do të finalizohet në janar.
Neroazzurët janë gati të shkëmbejnë lojtarin me sulmuesin e tyre të ri Andrea Pinamonti i cili ishte i huazuar te Genoa edicionin e kaluar.
Marrëveshja mes dy klubeve është shumë afër të arrihet, pasi mbeten vetëm edhe disa detaje sa i përket sulmuesit italian Pinamonti ku Interi ka kërkuar një klauzolë ku mund ta riblejë atë në të ardhmen.
Ndërkohë sa i përket Gervinhos, sulmuesi nga Bregu i Fildishtë i ka kthyer përgjigje pozitive Interit për t’iu bashkuar në janar.
33-vjeçari pritet që me kalimin te Interi të nënshkruajë kontratë për një vit e gjysmë.