Kreu i PD Lulzim Basha përmes një statusi në faqen e tij në Facebook, ka thënë se me kryeministrin e Kosovës Albin Kurti, diskutuan për të gjitha zhvillimet e rëndësishme politike dhe rajonale.
Basha tregon se ka siguruar kryeministrin Kurti se Qeveria e Kosovës, institucionet e Republikës së Kosovës dhe qytetarët e Republikës së Kosovës – se mund të vazhdojnë të mbështeten tek Partia Demokratike e Shqipërisë.
Ai mes tjerash ka premtuar se do të jenë si përherë krenarisht në krah të Kosovës së shtrenjtë.
Ja shkrimi i tij:
Në një takim të ngrohtë me kryeministrin e Kosovës, Albin Kurti, diskutuam për të gjitha zhvillimet e rëndësishme politike dhe rajonale. Ngritëm gjithashtu edhe çështjen kritike, se si të ndalojmë largimin e dhimbshëm të kaq shumë të rinjve nga Shqipëria dhe Kosova.
E sigurova kryeministrin Kurti se Qeveria e Kosovës, institucionet e Republikës së Kosovës dhe vëllezërit e motrat tona – qytetarët e Republikës së Kosovës – mund të vazhdojnë të mbështeten tek Partia Demokratike e Shqipërisë, sot si opozitë e fortë dhe e bashkuar, dhe nesër në drejtim të vendit, për t’i ofruar çdo ndihmë dhe për të marrë çdo vendim në mbështetje të Kosovës.
Ne jemi si përherë krenarisht në krah të Kosovës tonë të shtrenjtë!