Kryeministri Edi Rama i ka bërë disa herë thirrje Kosovës dhe Ministrisë së Shëndetësisë atje, se meqënëse Shqipëria është më përpara me procesin e vaksinimit, të ndihmojë edhe vëllezërit fqinj.
Mirëpo deri më tani në vendin tonë nuk ka ardhur asnjë mjek apo infermier i Kosovës për t’u vaksinuar. Sot MSH atje ka dhënë dhe tre arsyet se pse kjo gjë ende nuk ka ndodhur, duke theksuar se për asnjë moment nuk e kanë refuzuar thirrjen simbolike të Shqipërisë.
Ministria e Shëndetësisë së Republikës së Kosovës ka deklaruar se nuk kanë marrë shkresë zyrtare për vaksinimin e personelit shëndetësor kosovar në Shqipëri dhe se listën e personelit mjekësor që duan në mënyrë vullnetare të vaksinohen në Shqipëri ende nuk e kanë marrë nga SHSKUK dhe IKSHPK. Arsyeja tjetër është se Kosova dhe MSH kanë planin e tyre të vaksinimit brenda territorit.
“MSh nuk ka refuzuar këtë ndihme simbolike, por është e kuptueshme që fokusi është që vaksinimi të fillojë sa më parë në Kosovë. Deri tash, MSh nuk ka marrë ndonjë liste të personelit shëndetësor të deklaruar për të shkuar për vaksinim të organizuar në Shqipëri”, thuhet në përgjigjen e MSH-së.