Planet e presidentit amerikan, Donald Trump, për tërheqjen e rreth një të tretës së trupave nga Gjermania është kritikuar nga konservatorët gjermanë, por është mirëpritur nga politikanët majtistë.
Raportohet se kreu i Shtëpisë së Bardhë e ka urdhëruar Pentagonin që ta zvogëlojë numrin e trupave për 9,500 ushtarë nga 34,500 sa janë gjithsej në Gjermani si pjesë e një marrëveshjeje të gjatë mes aleatëve.
Johann Wadephul, nënkryetar i grupit parlamentar të Partisë Kristinademokrate të kancelares Angela Merkel, e cilësoi këtë tërheqje si thirrje për zgjim. “Planet tregojnë se administrata e Trumpit është duke e neglizhuar detyrën themelore të lidershipit, që t’i angazhojë partnerët e koalicionit në procesin e vendimmarrjes”, tha ai.
“Të gjithë përfitojnë nga qëndrimi i bashkuar i aleancës, vetëm Rusia dhe Kina përfitojnë nga mosmarrëveshjet. Uashingtoni duhet t’i kushtojë më shumë vëmendje kësaj”, shtoi ai, shkruan “The Guardian”.
Sidoqoftë, ndryshe mendon Dietmar Martsch, kryetar i grupit parlamentar të partisë majtiste “Die Linke”, i cili i mirëpriti planet e presidentit amerikan. “Qeveria federale duhet ta pranojë me mirënjohje këtë plan dhe shpejt ta fillojë përgatitjen e tërheqjes së plotë të ushtarëve amerikanë me administratën e Trumpit”, tha ai.
Ndërkohë Polonia po shpreson se do të sigurojë më shumë ushtarë amerikanë si pasojë e këtyre zhvillimeve. Kështu tha të shtunën kryeministri i këtij vendi, Mateusz Morawiecki. “Unë vërtet shpresoj që si rezultat i shumë bisedimeve që kemi pasur dhe duke dëshmuar se sa partner i qëndrueshëm jemi në NATO, disa nga trupat që tash për tash janë të vendosura në Gjermani të përfundojnë në Poloni”, tha ai për Radion RMF.