Koronavirusi i ri, i zbuluar fillimisht në qytetin e Wuhanit, në Kinë, dhe i raportuar pranë Organizatës Botërore të Shëndetësisë në 31 dhjetor, është përhapur në mënyrë të shpejtë në Kinë. Në gjashtë javët e kaluara ka infektuar mbi 40,000 qytetarë kinezë dhe ka vrarë më shumë se 1,000. Gjatë kesaj kohe , virusi kishte një emër të përkohshëm, 2019 – nCoV, ndërsa sëmundja respiratore e shkaktuar nuk kishte emër.
Të martën, OBSH i vuri emrin “COVID – 19” sëmundjes së shkaktuar nga koronavirusi, ku “CO” përfaqëson “korona”, “VI” për “virus” dhe “D” për “disease – sëmundje”. Ndërsa numri “19” lidhet me vitin kur u shfaqën rastet e para në Kinë.
Grupi i studimit të koronavirusit, pjesë e Komitetit Ndërkombëtar mbi Taksonominë e Viruseve, kishte detyrën për t’i vënë emrin vetë virusit. Virusi do të njihet si SARS – CoV – 2.
Pra:
- Koronavirusi i ri, i quajtur më parë 2019-nCoV, tani do të quhet zyrtarisht SARS-CoV-2.
- Sëmundja e shkaktuar nga SARS-CoV-2, do të quhet zyrtarisht COVID-19.
Koronavirusi i ri ka ngjashmëri gjenetike me virusin që shkaktoi epideminë e SARS gjatë viteve 2002 – 2003. Kështu emri është shumë i ngjashëm, por dhe pak ngatërrues.
Sipas OBSH, një emër zyrtar do të ndihmojë në parandalimin e pasaktësive dhe stigmatizimit, duke siguruar në të njëjtën kohë një format standart për ndonjë shpërthim të ngjashëm në të ardhmen.