Çdo mëngjes për Shpresa Gashin nis në hapësirat e Parkut të Qytetit.
Përveç kohës relaksuese që e kalon aty, prej tre vjetësh ajo i ushqen qentë endacakë.
Të qenët pronare e qenushit të quajtur “Coco”, e shtyu Shpresën t’ua sigurojë çdo ditë ushqimin këtyre kafshëve.
Kujdesi i rregullt ndaj tyre, siç thekson ajo, i ka kthyer qentë në mbrojtje të saj kudo në hapësirat e këtij parku.
Por, jo në të gjitha rastet kjo nismë e saj rezultoi me sukses, pasi siç shprehet shpesh është kërcënuar nga njerëzit e tjerë.
I rëndësishëm, sipas saj, është kontakti i parë drejt me këto kafshë, për të shmangur frikën ndaj tyre.
Problem i mëtejshëm, sipas Gashit, mbetet mungesa e strehimit të qenve endacakë.
Shpresa Gashi, nga Prishtina, thotë se do të vazhdojë t’i ushqejë qentë endacakë në Parkun e Qytetit e të kujdeset për ta, pavarësisht situatave jo të këndshme me të cilat ballafaqohet çdo ditë nga qytetarët e tjerë./Koha.net/