Lazio po përpiqet të fitojë terren në garën për shërbimet e mbrojtësit qendror të Hellas Verona, Marash Kumbulla. Kostoja e shqiptarit mbetet 30 milionë € dhe bardhekaltrit mund ta përballojë atë vetëm përmes kualifikimit në Champions. Po kështu, klubi kryeqytetas po mundohet të shfrytëzojë miqësinë e drejtorit të vet sportiv, Igli Tare, me Kumbullën.
Nga ana tjetër, të njëjtën gjë po synon edhe Lotito me mikun e tij, Setti. Për më tepër, të dy i kanë dhënë garanci eventuale lojtarit shqiptar për të qenë titullar te Lazio, sepse konsiderohet mjaft i rëndësishëm për planet taktike të Inzaghi. Një detaj jo i vogël për një djalë të ri, që ka nevojë të luajë rregullisht, të konsolidohet përmes rritjes progresive.
Pavarësisht se më i interesuari për talentin shqiptar është Interi, madje ka filluar negociatat prej janarit, “pasaporta shqiptare” do të luajë një rol përcaktues në vendimin final. Të paktën kështu raporton “Tuttosport”, duke pasur parasysh dy anët e medaljes, Marash Kumbulla dhe Igli Tare.