Eksportet gjermane u rritën për të katërtin muaj radhazi dhe më shumë se ç’pritej në Gusht, duke rritur shpresat për rimëkëmbje të fortë në tremujorin e tretë të ekonomisë më të madhe të Evropës.
Eksportet e përshtatura ndaj efekteve sezonale u rritën me 2.4%, pas një rritjeje me 4.7% në Korrik, sipas zyrës Federale të Statistikave. Importet u rritën me 5.8%, pas një rritjeje me 1.1% në muajin e kaluar. Sufiçiti tregtar u tkurr në 15.7 miliardë euro. Analistët thonë se më e keqja ka kaluar, por ekonomia gjermane nuk është imune ndaj pengesave në afat-shkurtër. Me bazë vjetore, zyra e Statistikave bëri të ditur se eksportet drejt kinës ranë me 1.1% në Gusht ndërsa eksportet drejt Shteteve të Bashkuara, ranë me 21.1%.
Eksportet drejt Mbretërisë së Bashkuar ranë me 7.4% me bazë vjetore. Ekonomia gjermane u tkurr me 9.7% në tremujorin e dytë, ndërkohë që shpenzimet e familjeve, investimet e kompanive dhe tregtia kolapsuan në kulm të pandemisë. Të dhënat zyrtare treguan se porositë për mallrat gjermanë u rritën me 4.5% në Gusht, sipër pritshmërive. Lehtësimi i masave të karantinës, së bashku me stimujt qeveritarë, kanë nxitur një rimëkëmbje në tremujorin e tretë. Megjithatë, rritja e rasteve të reja me koronavirus, ka ngritur shqetësime mbi perspektivën.
Ministri i ekonomisë, Peter Altmaier, tha në nisje të Javës se Gjermania duhet të shmangë një tjetër mbyllje të aktivitetit industrial.