Turqia do t’u kërkojë mediave sociale me trafik të lartë interneti të caktojnë atje një përfaqësues, i cili do të shqyrtojë shqetësimet e ngritura nga autoritetet për përmbajtjen në platformat e tyre. Lajmi bëhet i ditur nga agjencia Reuters, e cila disponon një kopje të draftit që do të shndërrohet në ligj.
Kompanitë që nuk respektojnë masën e re mund të përballen me përgjysmimin e bandës për 30 ditë pas urdhrit të gjykatës dhe reduktimin me 95% pas 30 ditësh të tjera nëse nuk merren masa.
Ligji do të zbatohet për rrjetet e mediave sociale, në të cilat kanë akses çdo ditë më shumë se 1 milion njerëz në Turqi.
Ankaraja monitoron në mënyrë të rreptë përmbajtjen e mediave sociale, veçanërisht gjatë periudhave të tilla si operacionet ushtarake dhe aktualisht pandemia e koronavirusit.
Në tre javë deri më 6 prill, u shqyrtuan më shumë se 3 500 llogari në mediat sociale, u identifikuan 616 të dyshuar dhe 229 u arrestuan për postime “provokuese”, sipas Ministrisë së Brendshme.
Masat e reja, të cilat janë përfshirë në projektligj, përqendrohen në masat ekonomike për të luftuar ndikimin e pandemisë së koronavirusit dhe kanë ngjallur shqetësim te përdoruesit e mediave sociale dhe analistët për shtrëngimin e kontrolleve nga ana e qeverisë për përmbajtjen e internetit. Ligji do të dërgohet për votim në Parlament javën e ardhshme.
Yaman Akdeniz, ekspert për të drejtat në internet dhe profesor në Universitetin e Stambollit Bilgi, tha se, nëse kompani të tilla si YouTube dhe Twitter nuk caktojnë një përfaqësues, ato gradualisht do të bëhen të papërdorshme në Turqi, si rezultat i masave të reja.
“Nga ana tjetër, nëse këto platforma caktojnë një përfaqësues në Turqi, bllokimi i aksesit, mbyllja e llogarisë dhe heqja e përmbajtjes do të rriten në masë“, tha ai, duke parashikuar se ligji pritet të çojë në hapjen e hetimeve dhe për pasojë edhe vetëcensurim.
Kompanitë do të duhet t’u përgjigjen autoriteteve për përmbajtjen brenda 72 orëve dhe t’i vënë në dijeni për të gjithë përmbajtjen e hequr ose të bllokuar në periudha tre-mujore, thuhet në projektligj. Kompanitë gjithashtu do të duhet të ruajnë të dhënat që u përkasin përdoruesve turq brenda vendit.
Nëse kompanitë nuk arrijnë t’u përgjigjen kërkesave brenda 72 orëve, ato do të gjobiten deri në 1 milion lira (148 000 dollarë), ndërsa ato që nuk raportojnë përmbajtjen e hequr ose të bllokuar apo nuk i ruajnë të dhënat në Turqi do të gjobiten deri në 5 milion lira.
“Të dhënat që mbahen në Turqi do t’u lejojnë autoriteteve turke të përdorin informacionin e përdoruesve, të cilin ata nuk mundeshin ta përdornin më parë, gjë që do të çojë në rritje të hetimeve dhe ndjekjeve penale“, tha Akdeniz.
Në gjashtëmujorin e parë të 2019-s, Turqia kishte numrin e dytë më të madh të vendimeve gjyqësore që kishin të bënin me Twitterin, sipas të dhënave të vetë rrjetit në fjalë.