Lajmi për vdekjen e gjykatëses së Gjykatës së Lartë, Ruth Bader Ginsburg, të premten, është titulli kryesor në mediat amerikane. Një zë i fortë i të drejtave të grave si dhe zëri kryesor liberal i Gjykatës së Lartë, Ginsburg me largimin e saj krijon një vakum që i jep shans presidentit Trump për të zgjeruar shumicën në këtë gjykatë vetëm dy muaj para zgjedhjeve presidenciale.
Ginsburg vdiq në moshën 87-vjeçare nga kanceri në pankreas. Ajo është emëruar në vitin 1993 nga Presidenti Bill Clinton dhe vitet e fundit ishte anëtarja më e vjetër e krahut liberal të gjykatës. Ajo ka mbajtur qëndrime progresive për çështjet sociale që kanë ndarë vendin, që nga e drejta e abortit, martesat e të njëjtit seks, e drejta e votës, imigracioni, kujdesi shëndetësor etj.
Analistët politikë e shohin largimin e saj si një mundësi që i jepet Trump-it për ta zhvendosur vëmendjen nga mënyra sesi është menaxhuar deri tani situata e pandemisë që u ka marrë jetën gati 200 000 amerikanë. Gjithashtu, largimi i Ginsburg galvanizon si bazën konservatore të Trump-it, ashtu edhe demokratët që ia kanë frikën një ndryshimi të ekuilibrave të pushtetit në Gjykatën e Lartë.
“Kjo do të gjenerojë një betejë titanike. Mund të ndikojë seriozisht në zgjedhje ”, thotë David Gergen, këshilltar politik, i cili u ka shërbyer katër presidentëve amerikanë, si republikanë, ashtu edhe demokratë.
Trump, i cili kërkon një mandat të dytë në zgjedhjet e 3 nëntorit, tashmë ka caktuar dy konservatorë në postet e përjetshme në gjykatë, Neil Gorsuch në 2017 dhe Brett Kavanaugh në 2018.
Lëvizja pas vdekjes së Ginsburg ka nisur menjëherë. Udhëheqësi i shumicës së senatit republican, Mitch McConnell, tha të premten se do të veprojë në bazë të ligjit me çdo nominim që i vjen nga Trump, ndërsa demokratët kanë kërkuar që vendi I saj të mbetet vacant deri pas 20 janarit, kur bën betimin fituesi i zgjedhjeve presidenciale.