Ministri i Brendshëm serb Aleksandar Vulin dhe njëkohësisht Presidenti i Lëvizjes Socialiste i ka kthyer përgjigje kryeministrit shqiptar Edi Rama në lidhje me deklaratën e këtij të fundit për bashkimin e Kosovës më Shqipërinë.
Në një prononcim për mediat serbe, ai tha se Rama kishte deklaruar se qëllimi i karrierës së tij politike është “Bashkimi i Shqipërisë me Kosovën”, ndërkohë që bën thirrje se e vetmja gjë së mund ta ndalojë këtë është formimi i të ashtuquajturës ‘bota serbe’.
‘Kur Kryeministri i Shqipërisë, Edi Rama, thotë se detyra e karrierës së tij politike është “bashkimi i Shqipërisë me Kosovën”, të gjitha vendet e Ballkanit heshtin, UNMIK -u, i cili kontrollon Kosovën dhe Metohinë sipas Rezolutës 1244, hesht, dhe BE nuk do të lëshojë deklaratat e saj të famshme që bëjnë thirrje për “të dyja palët e të vetëpërmbahen”. Kur unë, i cili nuk jam kryeministër i Serbisë, thërras në emrin tim për unitetin politik të të gjithë serbëve dhe them se detyra e brezit tim është të krijojë një ‘botë serbe’, atëherë i gjithë rajoni reagon dhe BE ka diçka për të thënë. Të gjithë heshtin për ‘Shqipërinë e Madhe’, serbët duhet të flasin”. Pengesa e vetme për ‘Shqipërinë e Madhe’ është krijimi i një ‘bote serbe’’ tha ai për mediat serbe.
Kujtojmë se kryeministri Edi Rama në një intervistë televizive, foli për planet e tij në 2030, aspiratat e tij për Kosovën si dhe tensionet e opozitës. I pyetur për ‘Bashkimin e Shqipërisë së Madhe’, Rama u shpreh se aspiron të bashkojë Shqipërinë me Kosovën por jo të jetë drejtuesi i tyre në mënyrë kategorike.
‘Jo, sepse dua të kem një pjesë të jetës ku të jem i çliruar nga përgjegjësitë. Është mëse e mjaftueshme për të gjithë që shërbimet e mia ndaj vendit si i pari i punës të kenë një limit. Bashkimi i Shqipërisë me Kosovën është në ëndrrat e mia, aspiratën time por jo të jem unë në krye. Kam plane të tjera.’ tha Rama.