KosovaNews ka bërë një hulumtim ekskluziv lidhur me pronësinë e televizionit kombëtar Klan Kosova që nga fillimet e operimit të tij në Kosovë e deri më sot. Në kohën kur i gjithë opinioni publik e di që Klan Kosova është pronë e vëllezërve Devolli më saktësisht Shkëlqim Devollit nga hulumtimi ynë e vërteta del të jetë krejt ndryshe dhe për më tepër SKANDALOZE.
Perandoria biznesore e vëllezërve Devolli është ngritur fuqishëm dhe përnjëhershëm që nga ardhja në pushtet e Partisë Demokratike të Kosovës në Vitin 2007.
Biznesmeni Shkëlqim Devolli, është një nga njerëzit më të afërm të Adem Grabovcit “shefin e shefave të krejt Kosovës dhe ma gjanë” siç e quante ish-Kryeministri Thaçi, Grabovcin në aferën “Pronto”.
Në po këtë aferë Shkëlqim Devolli dëgjohet duke komunikuar me Adem Grabovcin:
Grabovci: A e kanë nënshkru ata ?
Shkëlqim Devolli: Po po e kanë nënshkru…
Grabovci: qy se s’mujta me tëthirrë se mu ka zbraz krejt fyti…!
Shkëlqim Devolli: u ba shef qe po t’i qoj…
Dëgjohej duke biseduar përmes telefonit Adem Grabovci dhe duke ju ankuar Shkëlqim Devollit për “tharjen e fytit”…
“Republika e Devollistanit’’
Përbrenda 10 viteve vëllezërit Blerim dhe Shkëlqim Devolli ngritën me dhjetëra biznese të tyre dhe në rrethana të errëta arritën ta gllabërojnë pothuajse gjithë ekonominë e tregut në Kosovë që nga Terminalet Doganore, Homologimi i veturave, tregun e kafes, të miellit, të qumështit etj, e deri te fusha e telekomunikimit me telefoninë virtuele, por me dëm real për Kosovën – Z-Mobile, provajderin e internetit dhe TV-së kabllore – Art Motion dhe së fundi edhe televizionin më të madh në vend Klan Kosova.
Por kush është në fakt pronari i vërtetë i televizionit Klan Kosova?
Në më se 200 faqe materiale të siguruara dhe të nxjerra nga institucionet e Kosovës dhe Maqedonisë Veriore çuditërisht askund nuk figuron emri i biznesmenit Shkëlqim Devollit.
Pronësia e televizionit Klan Kosova në bazë të dokumenteve që ka siguruar KosovaNews është tepër e ndërlikuar. Ajo fillon nga një shtetas shqiptar kur është hapur në vitin 2008, blihet nga një shtetas i Kosovës në vitin 2013, pastaj i njëjti pronësinë e kalon në kompaninë e tij të hapur në Maqedoni ku është i regjistruar si shtetas i Serbisë, pastaj shitet në vitin 2015 në parajsat fiskale në British Virgjin Island dhe përfundon përsëri në Maqedoninë Veriore në vitin 2021, ku edhe pronari aktual e ka të regjistruar në pronësi të kompanisë së tij të hapur me pasaportë serbe me adresë “Djakovica, Serbia” (srb. Gjakovë, “Serbi” sic.) dhe ku sipas dokumenteve figuron se kjo kompani e inkorporuar në Maqedoninë e Veriut si shpk një-anëtarëshe (DOOeL) është një shtetas i huaj dhe atë nga Serbia!
Po, Po. Nga Serbia, ku adresa a pronarit figuron si: “Ul. Hisni Zajmi, Djakovica, Serbia”. Pra sipas të dhënave zyrtare pronar “me letra” i Klan Kosovës rezulton të jetë z. Kushtrim Gojani, i cili pronësinë e Klan Kosovës e ka në një kompani me veprimtari hollding në Maqedoninë Veriore. Gojani këtë kompani e ka regjistruar si investim i huaj nga Serbia, ku si adresë e tij në cilësinë e pronarit dhe drejtorit figuron: Rr. Hysni Zajmi në Gjakovë, Serbi , por që qyteti jug-perendimor i Kosovës , sipas akteve ligjore që i njëjti i ka nënshkruar, na qenka në Serbi.
Historia
Televizioni Klan Kosova fillimisht është regjistruar në Agjencinë e Regjistrimit të Bizneseve të Kosovës në vitin 2008, me pronar z. Aleksandër Frangaj nga Republika e Shqipërisë.
Gjithnjë sipas historiatit të kësaj shoqërie, të pranuar në formë zyrtare nga ARBK, më 14 gusht 2013 kompaninë Klan Kosova Sh.P.K e blenë një person krejtësisht anonim për opinionin publik, së paku për botën e gazetarisë e mediave, quhet Florent Nallbani, me adresë të regjistruar në Rr. Fehmi Agani në Prishtinë. Megjithë tentimin për ta kontaktuar z. Nallbani, ne nuk kemi arritur te arrijmë të njëjtin me kontaktet e dhëna nga ARBK.
Më 15 janar 2014, z. Nallbani pronësinë e Klan Kosovë e bartë në Maqedoni duke ja dhuruar (Po, po. Dhuruar.) të gjitha aksionet kompanisë “K-Media Corporation DOOEL”. Në po në atë kohë drejtor i Klan Kosovës ishte emëruar Baton Haxhiu i cili njëherit ishte edhe përfaqësues i autorizuar i kompanisë Klan Kosova Sh.P.K nga viti 2014 e deri më 2020.
Sipas të dhënave të regjistrit tregtar të Maqedonisë së veriut (crm.com.mk) edhe kompania “K-Media Corporation Dooel” ishte pronë e Florent Nallbanit, të cilën adresa e këtij të fundit figuronte si “Peç Serbia” (srb./maq. Pejë, “Sebi”), ndërsa në certifikaten e regjistrimit të kësaj kompanie, figuron të jetë një investim i huaj nga Serbia!?
Më 2 dhjetor 2015 “ K-Media Corporation DOOEL” që e kishte në pronësi Klan Kosovën aksionet e këtij të fundit ja shet një kompanie fantome “Saine Group” LTD, me seli në British Virgjin Islands, një parajsë fiskale për shpërlarjen e parave e përfolur në shumë artikuj të gazetarisë hulumtuese botërore.
Interesante është të ceket se adresa e “Seine Group” LTD është në PO BOX 3136, Road Town Tortola, British Virgin Islands, del të jetë adresa e njejtë ku janë të regjistruara me qindra kompani që në këto hulumtime lidhen me evazion fiskal, pastrim parash, fshehje të pasurisë së zyrtarëve të korruptuar, politikanëve e diktatorëve të vendeve të ndryshme, kryesisht nga gadishulli arabik, amerika latine, Evropa lindore dhe oligarkëve rusë.
Praktikat juridike për bartje të aksioneve nga K-Media Corporation DOOEL të Shkupit që zyrtarisht ishte pronare e Klan Kosova Sh.P.K (që e përfaqësonte një maqedonas, z. Nikolla Gjeorgjiev) tek kompania nga British Virgin Islands i ishte besuar (dully authorized) siç shkruan në dokumentin e siguruar nga KosovaNews) një kompanie avokatësh nga Prishtina, të përfaqësuar nga z. Blerim Prestreshi, sipas autorizimit (Power of Attorney) të dhënë nga një avokat nga Qiproja, z. Marinos Stylianides, i cili në këtë autorizim të shkruar figuron si drejtor dhe sekretar i kompanisë “Seine Group” LTD.
Në dokomentet që i kemi pranuar zyrtarisht nga ARBK nuk ka qenë edhe çertifikata e pronësisë dhe e përfituesve real të kompanisë “Seine Group” LTD nga British Virgin Islands. Ndërsa avokati Prestreshi figuron të jetë bashkpronarë i dy kompanive të avokatisë: “Shoqëria E Avokatëve SCLR Partners SHPK” SH.P.K. dhe “Shoqëria E Avokatëve SCLR Partners” SH.P.K.
Për 5 vite me radhë “Kumbari” Baton Haxhiu me manovrimet e tij pronësinë e Klan Kosovës ua “beson” njerëzve të “Braça Kariç” familjes së afërt me Sllobodan Millosheviçin dhe diktatorin bjellorus Lukashenko.
Pra, që nga viti 2015 e deri më 2020 aksionet e Klan Kosovës ndodheshin në “Parajsën në det të hapur” vendit ideal për shpërlarjen e parave të politikanëve të korruptuar e oligarkëve botërorë dhe sidomos oligarkëve rusë.
Sipas Konsorciumit Ndërkombëtar të Gazetarëve Hulumtues (ICIJ) studiuesit analizuan të dhënat nga Baza e të dhënave të rrjedhjeve në det të hapur të, e cila përmban informacione për më shumë se 810,000 subjekte në det të hapur. ICIJ mori të dhënat përmes pesë rrjedhjeve masive: Pandora Papers , Paradise Papers , Bahamas Leaks , Panama Papers dhe emri i bazës së të dhënave, Offshore Leaks . Të dhënat lidhen me njerëz dhe kompani në më shumë se 200 vende të botës të cilat tregojnë se këto kompani kishin deponuar para prej dhjetëra miliarda dollarësh.
Gjithashtu, avokati Marinos Stylianides ishte sekretar i kompanisë dhe mbajtës i aksioneve të kompanisë “Seine Group LTD” kompani që e kishte në pronësi Klan Kosova “Sh.P.K”. Nga viti 2015-2020 Marinos Stylianides figuron edhe tek një skandal i fshehjes së pasurisë nga e bija e diktatorit Bjellorus dhe aleatit të Putinit, Aleksander Lukashenko dhe familjes Kariç, me origjinë nga Peja. Familja Kariç ishte e afërt me kasapin e Ballkanit Sllobodan Millisheviq. Bogolub Kariç perandorinë e tij biznesore e ngriti gjatë kohës së regjimit të Sllobodan Millosheviqit duke ngritur biznese të fuqishme si ato të telefonisë mobile (Mobtel), banka dhe kompani ndërtimore, ai u arratis nga Serbia dhe për 10 vite me radhë gjeti strehë në Bjellorusi tek miku i tij diktatori Llukashenko.
Pas plasjes së skandalit Panama Paper në vitin 2016 Bashkimi Europian kompanitë që i menaxhonte avokati grek u ka vënë sanksione.
I gjithë ky skandal kishte ndodhur përderisa Drejtor dhe përfaqësues i autorizuar i Klan Kosovës ishte Baton Haxhiu.
Skandali i avokatit qipriot i cili, sipas artikullit rezultoj me fshehjen e aksioneve të Kariçëve me origjinë nga Peja, të afërm të kasapit të Ballkanit Millosheviç e të diktatorit të Bellorusisë – Llukashennko, për pasojë Brukseli vendosi sanksione për këto kompani e individë të lidhur me to.
Më 17 prill 2020, 100% të aksioneve të Klan Kosova Sh.P.K i blen kompania nga Maqedonia “KGOMEDIA INVESTMENT” DOOEL e regjistruar si investim i huaj nga Serbia…
Sipas kërkesave dhe të dhënave që kemi nxierrë nga Agjencioni Qëndror i Regjistrit në Maqedoni kjo kompani është në pronësi të Kushtrim Gojanit të cilën Gojani e ka të regjistruar me pasaportë Serbe e ku si adresë i figuron Gjakovë, “Serbi” (srb./maq. “Djakovica, Serbia” Në certifikaten e regjistrimit të Maqedonisë përshkruhet si investim i huaj nga Serbia.
Në maj të 2021, në ARBK me autorizimin e pronarit të Klan Kosovës Kushtrim Gojanit pasqyrohen këto ndryshime nga ana e avokatit Astrit Lekaj nga Novosella e Gjakovës.
ARBK-ja fillimisht heziton të na jep dokumentet dhe lëndën e “Klan Kosova” Sh.P.K
KosovaNews duke u thirrur në ligjin për qasje në dokumente publike për javë të tëra ka pasur korrespodenca me Agjencinë e Regjistrimit të Bizneseve të Kosovës duke kërkuar dokumentet dhe historinë e pronarëve të Klan Kosova Sh.P.K . Fillimisht ARBK ka hezituar të na jep dokumente nën arsyetimin se kjo është sekret biznesi dhe se këto dokumente mund t’i marrim vetëm me lejen e biznesit mirëpo pasi kemi bërë ankesë në Agjencinë për Qasje në Dokumente Publike këto të dhëna dhe informacione na janë dërguar nga ARBK.
Pasi kemi marrë dhe kemi analizuar dokumentet aty kemi parë që në ARBK janë bërë shkelje të rënda duke u pranuar dokumente të cilat shkelin Kushtetutën dhe Integritetin Territorial të Republikës së Kosovës.
Në vitin 2014 në certifikatën e pronësisë së Kompanisë “ K-Media Corporation DOOEL” e cila e mori në pronësi kompaninë Klan Kosova Sh.P.K të cilën pronari z. Florent Nallbani e kishte dorëzuar të përkthyer dhe noterizuar në ARBK si adresë i figuron: Pejë Republika e Kosovës ndërsa Shteti thotë Serbia?!
Duket qartë se edhe pronari edhe zyrtarët e ARBK-së por edhe noteri që e kishte përkthyer dhe noterizuar certifikatën e pronësisë kishin qenë të vetëdijshëm se ishin duke bërë shkelje ligjore, dhe ishin munduar gjithsesi ta futnin termin Republika e Kosovës si adresë edhe pse në certifikatën origjinale nga Maqedonia nuk figuronte Kosova askund pasi që kompania ishte e regjistruar me pasaportë serbe me adresë “Pec, Serbia”.
Ndërsa në certifikatën e pronësisë të nxjerr nga Regjistri Qëndror i Maqedonisë Veriore
të kompanisë “KGO MEDIA INVESTMENT” DOOEL me pronar z. Kushtrim Gojanit, kompani e cila aktualisht e ka në pronësi Klan Kosova Sh.P.K të dhënat e pronarit figurojnë se është shtetas i Serbisë me adresë “Peç, Serbia”.
Të gjitha këto dokumente ndër vite janë pranuar edhe në ARBK në mesin e qindra faqeve si përfaqësues i autorizuar nga pronari Kushtim Gojani për rregullimin e dokumenteve në ARBK kemi gjetur edhe emrin e Astrit Lekaj djali e deputetit të AAK-së dhe ish- ministrit të Infrastrukturës Pal Lekaj.
Për të gjitha këto gjetje ne i kemi dërguar pyetjen përfundimtare u.d. të kryeshefes së ARBK-së znj.Pranvera Prestreshi e pyetur se në bazë të cilit ligj, cilit nen të ligjeve të Republikës së Kosovës janë pranuar këto dokumente në ARBK? Kush janë zyrtarërt që janë të përfshirë në këtë skandal ku është shkelur kushtetuta dhe ligjet e Republikës së Kosovës.
Në përgjigjien të dhënë me 12 qershor znj. Prestreshi thotë se: “Pyetjet e juaja drejtuar ndaj zyrtarëve të ARBK-së, tejkalojn kompetencat e mija për të dhënë mendime lidhur me legjitimitetin e dokumenteve personale të individëve të caktuar. Personat e apostrofuar nga ana e juaj kur kanë aplikuar për regjistrim të biznesit në ARBK janë paraqitur si person juridik, i cili ka pasur regjistrim në një shtet tjetër dhe i cili shtet ka legjislacionin e vet për regjistrim, andaj me siguri dokumentacioni i tyre personal për atë shtet ka qenë valid (meqë është bërë një regjistrim i tillë). Në ARBK, personat e apostrofuar kanë sjellur dokumentacionin personal të lëshuar nga institucionet e Republikës së Kosovës, Zyrtarët e ARBK-së kanë pasur dhe kanë obligim që të pranojnë dhe regjistrojnë subjektet e ndryshme vetëm atëherë kur ata dorëzojnë dokumentacionin e kërkuar sipas Ligjit për Shoqëritë Tregtare” Thuhet në përgjigjen e Kryeshefes së ARBK-së. Si përfundim mund të konstatoj se regjistrimet e Shoqërive Tregtare të kerkuara nga ju janë bërë me dokumentacion personal të apostrofuarve të lëshuar nga Institucionet e Republikës së Kosovës” thuhet në përgjigjien e znj.Prestreshi
KosovaNews i ka dërguar pyetje edhe pronarit ligjor të Klan Kosovës z.Kushtrim Gojanit për ta pyetur për të gjitha këto gjetje: Se ku i kishte marrë paratë duke qenë se zotëron një kompani që kap vlera disamilionëshe, pse e ka të regjistruar kompaninë që e ka në pronësi Klan Kosovën me dokumente të Serbisë të nxierra nga strukturat paralele në Kragujevc , kush e ka shtyrë t’i bëj të gjitha këto manovrime të dyshimta etj.? mirëpo ai nuk na është përgjigjur, gjithashtu kemi tentuar ta kontaktojmë përmes telefonit zyrtar mirëpo nuk ka qenë i qasshëm.
Në ditën që i dërguam pyetje drejtorit të Klan Kosovës për këtë skandal në po atë ditë Adriatik Kelmendi jep dorëheqje nga pozita e drejtuesit të Klan Kosovës
Për të gjitha gjetjet e mësipërme KosovaNews ka dërguar pyetje zyrtare drejtorit të Klan Kosovës Adriatik Kelmendi për ta pyetur se a kishte njohuri për pronësinë e Klan Kosovës dhe me kënd kishte negociuar kur ishte emëruar në atë pozitë në vitin 2020?
Sa është etike dhe morale nga ana tij të punononte në një medium Kombëtar të Republikës së Kosovës në të cilin pronari pronësinë e Klan Kosovës e ka të regjistruar me pasaportë SERBE me adresë “Djakovica, Serbia” etj.
Në po atë ditë Adriatik Kelmendi del publikisht përmes një statusi në Facebook dhe jep dorëheqje nga drejtimi i Klan Kosovës pa dhënë detaje për arsyet e dorëheqjes! Ndërsa pyetjeve të KosovaNews nuk iu përgjigj fare edhe pse ne i kemi dërguar në disa adresa zyrtare dhe private të tij.
Sipas burimeve të KosovaNews, Adriatik Kelmendi kishte njohuri për këto të dhëna pasi që ne disa javë më parë i kishim dërguar pyetje edhe pronarit të Klan Kosovës Kushtrim Gojanit i cili si duket e ka informuar edhe Adriatik Kelmendin se këto dokumente tashmë ishin në posedim të mediumit tonë dhe pritet publikimi i artikullit. KosovaNews mëson se kjo ka qenë edhe arsyeja e vetme që z.Kelmendi ka dhënë dorëheqje nga drejtimi i Klan Kosovës. Si duket etike dhe morale për Adriatik Kelmendin është vetëm nëse këtë skandal e merr vesh edhe opinioni publik.
Vazhdon…