Kryediplomatja Donika Gërvalla i ka reaguar gazetës zvicerane të cilës i dha intervistë, duke thënë se në artikullin e intervistës së saj, NZZ ka pohuar gënjeshtra se UÇK-ja ka kryer vrasje pas përfundimit të luftës.
Gërvalla, e cila nga ky medium u citua të ketë thënë se civilë shqiptarë janë vrarë pas luftës dhe se për ta duhet të ketë drejtësi, sot shkruan se nëse janë kryer krime, ato i kanë bërë individët, e jo UÇK-ja.
“NZZ publikoi pohimin e rremë se UÇK-ja kreu vrasje pas përfundimit të luftës. UÇK-ja u shpërbë pas çlirimit të Kosovës në qershor 1999. Nëse krimet thuhet se janë kryer, ato janë bërë nga individë, jo nga UÇK-ja”, ka shkruar Gërvalla.
Ajo ka përmendur UÇK-në dhe FARK-un, që tha se kanë shpëtuar civilë të pafajshëm.
“Gjatë gjenocidit në Kosovë, burra dhe gra të panumërta në UÇK, FARK dhe të tjerë sakrifikuan jetën e tyre për të shpëtuar civilë të pafajshëm nga asgjësimi serb. Liria e medias gjithmonë duhet të mbrohet. Por kështu është e vërteta”, ka shkruar ajo.
“Gërvalla-Schwarz kërkon që shumë vrasje të pasluftës në vend të zgjidhen. Pas tërheqjes së trupave serbe, ato u kryen kryesisht nga anëtarët e Ushtrisë Çlirimtare Kosovës, UÇK. Viktimat ishin serbë, romë dhe shqiptarë oponent të UÇK’së”, thuhet ndër tjerash në artikullin e mdiumit zviceran për të cilin Gërvalla dha intervistë.
Pas reagimeve të ashpra në drejtim të saj, Gërvalla tha mbrëmë se publikimi i kësaj interviste në mediat kosovare është “një fushatë që po bëhet kundër saj”.
Siç shkruhet në artikull, kryediplomatja kosovare fajin për mos-zgjidhjen e rasteve të vrasjeve të pasluftës ua lë gjyqësorit dhe pushteteve të mëhershme, derisa theksohet në të njëjtin paragraf se kryeministri Albin Kurti e ka kundërshtuar Gjykatën Speciale.
“Së bashku me të tjerët, unë kam kërkuar vazhdimisht që vrasjet politike pas përfundimit të luftës të hetohen plotësisht”, ka deklaruar Gërvalla-Schwarz për NZZ, derisa ka kërkuar drejtësi papërjashtimisht për shqiptarët, serbët e romët.
Zëvendëskryeministrja më parë i pati akuzuar ish-krerët e UÇK-së për, siç pretendon ajo, vrasje të kundërshtarëve politikë pas luftës. Atëbotë, ajo premtonte se do të depononte dëshmi nëse do krijohej një gjykatë që do t’i gjykonte ata.