Dy miq në Caserta të Italisë porositën kafe dhe paguan për të nga 50 euro secili.
Pagesa ishte vullnetare. Të dy ata thanë se pjesa e mbetur e parave, që ështe padyshim ajo më e madhja, shkonte për punonjësit e barit, në kohën kur ata, ashtu si dhe shumë të tjerë që punojnë në sektorin e shërbimit, janë goditur fort prej masave të izolimit të marra në përpjekje për të frenuar përhapjen e koronavirusit.
“ Ju faleminderit nga zemra”, shkroi në Facebook pronari I lokalit. Episode të ngjashme kanë ndodhur edhe në pjesë të tjera të vendit. Mjaft qytetarë italianë, për të ndihmuar baret e detyruara të mbyllen për muaj të tërë nga emergjenca e Covid-19, po kryejnë gjeste të tilla solidaritetit. Në Cagliari, një qytetar e pagoi kafen 50 euro dhe tha:
“ Mbajeni kusurin. Keni qenë të mbyllur për 50 ditë. Është më e pakta që unë mund të bëj”.
Diku tjetër, la një zarf me para dhe një pusullë ku shkruhej: “ Kjo është mbështetja ime modeste, zëreni se në muajt mars dhe prill kam ardhur ta pij këtu kafen përditë”. Në Itali është në rënie numri i viktimave nga sëmundja, por bilanci i më shumë se 32.000 viktimave mbetet një plagë për vendin fqinj, I treti në botë me numrin më të madh të vdekjeve nga koronavirusi pas SHBA-së dhe Britanisë së Madhe.