Në samitin e Procesit të Berlinit në Tiranë të hënën, kryeministri Albin Kurti është takuar edhe me kancelarin gjerman, Olaf Scholz.
Për këtë takim ka njoftuar Kurti përmes fotografive që ka pubikuar në llogarinë në Facebook.
“Takim pune me Kancelarin e Gjermanisë Olaf Scholz, gjatë Samitit të Procesit të Berlinit, në Tiranë”, ka thënë Kurti.
Kancelari gjerman gjatë samitit ka folur edhe për krizat në Ballkan, e konkretisht ato në veri të Kosovës, duke përmendur sulmin terrorist që ndodhi më 24 shtator.
Scholz ka thënë se është koha për të tejkaluar krizat.
“Krizat e shumëfishta këtu në rajon në Ballkanin Perëndimor kanë theksuar nevojën urgjente për të punuar më fort së bashku dhe për të tejkaluar antagonizmat. Ka ardhur koha për të tejkaluar konfliktet të cilat kanë vijuar për shumë më gjatë. Përshkallëzimet e fundit në veri të Kosovës, kanë vërtetuar sesa të rëndësishme janë këto”, u shpreh Scholz.
Kancelari gjerman porositi Kosovën dhe Serbinë që të zbatojnë marrëveshjet e arritura përmes dialogut.
“Ne duhet të përfundojmë më në fund zbatimin e marrëveshjeve të cilat janë arritur me anën e dialogut të udhëhequr nga BE-ja”, tha ai.
https://www.facebook.com/albini2017/posts/874222644071464?ref=embed_post