Opera e parë shqiptare e Kosovës, “Goca e Kaçanikut”, është shfaqur për herë të parë në skenën e Operës dhe Baletit Kombëtar në Shkup, duke sjellë emocione të veçanta për artdashësit shqiptarë në Maqedoninë e Veriut.
Vepra e kompozitorit të njohur Rauf Dhomi, me regji të mjeshtrit Nikolin Gurakuqi dhe nën dirigjimin e Edon Ramadanit, u interpretua me përkushtim nga solistët, Kori dhe Orkestra e Operës së Kosovës, në bashkëpunim me Baletin Kombëtar të Kosovës.
Shfaqja u mirëprit nga publiku, duke dëshmuar edhe një herë rëndësinë që kjo vepër ka në historinë e muzikës dhe kulturës shqiptare.
“Goca e Kaçanikut” pati premierën në Prishtinë në muajin shkurt të para dy viteve. Pas suksesit në kryeqytet, opera u shfaq edhe në Gjakovë dhe Tiranë, për të vazhduar kështu rrugëtimin e saj në skena të tjera kombëtare e rajonale.