Kryetarja e Kuvendit të Kosovës, Vjosa Osmani, gjatë ditës së sotme ka zhvilluar një bashkëbisedim me Zyrën e Organizatës Botërore të Shëndetësisë në Kosovë.
Osmani mbajti takim virtual me Sergei Koryakun, zyrtar ndërlidhës i OBSH-së në Kosovë, si dhe me zyrtaren profesionale të Emergjencave, Isme Humolli.
Në këtë takim u diskutua nevoja e vazhdimit të bashkëpunimit ndërmjet Kosovës dhe OBSH-së në përpjekje për menaxhim të suksesshëm të pandemisë COVID-19.
Kryetarja njoftoi zyrtarët e OBSH-së në lidhje me “iniciativën ligjore të ndërmarrë, me qëllim që vendimet për masat anti-COVID të kenë bazë ligjore, teksa organet e rendit të kenë mundësinë e veprimit aty ku hasen shkelje”, thuhet në komunikatën për medie.
Duke qenë se pandemia nuk ka përfunduar dhe vendimet e vonuara mund të sjellin dëme të mëdha, gjatë këtij takimi u potencua edhe rritja e fokusit ndaj sektorit të shëndetësisë.
Palët diskutuan edhe për rëndësinë e shembullit që duhet të paraqesin liderët institucionalë, duke respektuar masat mbrojtëse, për të ndërtuar një normë të re të sjelljes në kohë pandemie.