Miradije Rizvani Klenja/

Me datë 29-09-2024 në qytetin e Waterbury të Connecticut, komuniteti shqiptaro-amerikan “Hasan Prishtina” priti në vizitë kryeministrin e Republikës së Kosovës z. Albin Kurti dhe Ministren e Punëve të Jashtme dhe Diasporës znj. Donika Gërvalla Szhwartz.

Pritja e ngrohtë dhe e përzemërt e aq madhështore u shoqërua me një ceremoni artistike ku grupi i valltarëve të vegjël të veshur me kostume tradicionale shqiptare përforcoi me këngë e valle nga folklori popullor shqiptar. Në sajë të mërgatës shqiptare në Amerikë fjalë rasti mori kryetari i komunitetit z. Agim Ismaili i cili mes tjerash u shpreh duke falenderuar kryeministri përzemërsisht që ndodhej midis nesh.

Më pas fjalë rasti mori znj. Miradije Rizvani Klenja e cila shpalosi themelimin e Komunitetit formuar nga viti 1983 dhe kontributin e kësaj shoqate në ruajtjen e vlerave dhe traditave kombëtare ndër breza për ata fëmijë që lindin dhe rriten në SHBA si dhe kontributin e mërgimtarëve shqiptarë në mbrojtjen e Kosovës dhe financimin e UÇK-së për lirinë e Kosovës. Momenti më frymëzues dhe më i veçantë ishte kur kryetari i qytetit të Waterbury Paul K Pernerewsky Jr. kryeministrit Kurti ia dhuroi çelësin e qytetit në shenjë mirënjohje.

Më pas fjalë mbështetëse për kombin tonë foli edhe senatori amerikan Richard Blumenthal i cili shpalosi mbështetjen e pareshtur të SHBA -ve për pavarësinë e Kosovës nëpërmjet ish ambasadorit dhe mikut të përjetshëm të shqiptarëve Wiliam Walker. Falemenderime të përzemërta në emër të komunitetit tonë dhe gjithë shqiptarëve që jetojnë në Waterbury dhe rrethinë, edhe për zëvendësministren Gërvalla Schwartz, bijen e veprimtarit të shquar Jusuf Grvalla, zëvendësen e saj Liza Gashi, Konsullin e Përgjithshëm të Kosovës në New York Blerim Reka për vizitën dhe momentet e bukura që kaluam bashkë.

/Gazeta dielli/