Sot raportohet se qeveria e Kosovës ka vendosur heqjen e barrierave doganore me Serbinë dhe Bosnje Hercegovinës, një hap që është deklaruar se do të shoqërohet nga reciprociteti. Reciprociteti është një fjalë që nuk i pëlqen SHBA-së në rastin e Kosovës, pasi pavarësisht këtij deklarimi, ambasada në Prishtinë e ka cilësuar atë pengesë të re.
Shtetet e Bashkuara ishin të qarta se Kosova duhet t’i heqë të gjitha tarifat dhe të mos krijojë barriera të reja sepse këto politika lëndojnë njerëzit e Kosovës dhe e ngulfatin ekonominë e vetë Kosovës.
Mbesim në kundërshtim të veprimit të fundit për zbatimin e masave të reciprocitetit ndaj qarkullimit të mallrave nga Serbia. Këto masa krijojnë më shumë probleme në kohën kur SHBA-të besojnë se marrëveshjet për linjë ajrore, hekurudhore, dhe për autostradë, të arritura mes të dyja palëve, do të rrisin zhvillimin ekonomik kur ato të zbatohen, dhe do të krijojnë kushtet e nevojshme për dialog të suksesshëm, shkruan në njoftim.
Nuk është e qartë se ku konsiston kjo politikë dhe se çfarë do të thotë ajo veç poshtërimit të një qeverie si ajo e Kosovës. SHBA nuk kanë në dorë të detyrojnë Serbinë të njohë Kosovën pse kjo e fundit premton heqjen e tarifave. Ato mund të jenë parakusht për nisjen e dialogut por që ai të kurorëzohet do të kërkohet kompromis dhe ky kompromis është bërë e qartë se nënkupton lëshime territoriale.
Është kjo politikë që interferon brutalisht në zhvillimet e brendshme të Kosovës, duke e shndërruar rotacionin me puç parlamentar në një emergjencë të sigurisë në këtë vend dhe pse jo me ndikime edhe në Shqipëri.