Një referendum në Serbi mbi bashkimin e vendit në BRICS apo në BE është opsion real. Zëvendëskryeministri serb, Aleksandar Vulin, e la të hapur këtë mundësi në një intervistë për agjencinë ruse të lajmeve, TASS.
Kur presidenti serb flet për diçka, duhet marrë shumë seriozisht. Ne jemi duke e studiuar BRICS. Tani për tani, grupi po fiton popullaritet gjithnjë e më shumë në mesin e serbëve dhe në Serbi në përgjithësi. Dhe duket si një mundësi emocionuese për ne, sepse deri më tani, e vetmja mundësi për ne ishte Bashkimi Evropian ose BRICS dhe do të duhet të bëhet nga qytetarët e Serbisë në një referendum.
Vulin tha se Serbia nuk ka vendosur ende nëse duhet t’i bashkohet BRICS si një anëtar i plotë apo një vend partner, por theksoi se anëtarësimi në BRICS do t’i jepte Serbisë akses në tregjet e Rusisë, Kinës dhe Indisë.
“Do të ishte një mundësi e shkëlqyer për ne që të kemi akses në tregun kinez, rus dhe indian dhe në tregjet e vendeve të tjera anëtare të BRICS. Kjo do të ishte thjesht e mrekullueshme,” tha ai.
Duke u ndalur te pasojat që mund të ketë kjo për përpjekjen e Serbisë për integrimin në BE, Vulin shtoi: “Ne jemi një vend i pavarur dhe do të sillemi në një mënyrë të tillë që të përfitojë Serbia dhe populli i saj,” tha ai.
“Nga ana tjetër, ne kemi shpenzuar dekada duke u përpjekur të bëhemi pjesë e Bashkimit Evropian. Do të ishte krejt e papërgjegjshme nga ana jonë të themi papritur se kjo nuk do të ndodhë më,” pranoi ai. “Le të presim që evropianët vetë ta thonë këtë. Jam i sigurt se do ta dëgjojmë.”
Samiti i 16-të i BRICS, i cili ishte ngjarja kryesore e presidencës ruse në grup, u zhvillua në Kazan nga 22 deri më 24 tetor. Deklarata përmbyllëse trajtoi zhvillimin e grupit, pikëpamjet e tij mbi çështjet globale dhe zgjidhjen e krizave të tilla rajonale si ato në Ukrainë dhe Lindjen e Mesme.
Grupi BRICS u themelua në vitin 2006 nga Brazili, Rusia, India dhe Kina, ndërsa Afrika e Jugut iu bashkua në vitin 2011. Më 1 janar 2024, anëtarë u bënë edhe Egjipti, Etiopia, Irani, Arabia Saudite dhe Emiratet e Bashkuara Arabe. Samiti në qytetin rus të Kazanit është i pari në të cilin morën pjesë.