Një infermier në Kaliforni doli pozitiv për COVID-19 një javë pasi iu injektua vaksina e Pfizer Inc.
Matthew W., 45 vjeç, u vaksinua më 18 dhjetor. Ai ka rrëfyer në profilin e tij se përveçse pak dhimbjeje në krah për shkak të injeksionit, nuk ka pasur efekte anësore.
Gjashtë ditë më vonë në prag të Krishtlindjes, ai u sëmur pasi punoi në një turn në njësinë COVID-19. Simptomat e para ishin: ethe, dhimbje muskulore dhe lodhje.
Testi në spital e nxori pozitiv për COVID-19 një ditë pas Krishtlindjes.
Christian Ramers, specialist i sëmundjeve infektive në Qendrat Shëndetësore Familjare të San Diegos, thotë për ABC News se ky skenar nuk ishte i papritur.
“Ne e dimë nga provat klinike të vaksinës që do të duhen rreth 10 deri në 14 ditë që ju të filloni të zhvilloni mbrojtje nga vaksina. Kjo dozë e parë mendojmë se jep diku rreth 50%, dhe duhet doza e dytë për të arritur deri në 95%”, shpjegon Rames.