Arsenali është skuadra e fundit që ka hyrë në garë për shërbimet e mbrojtësit të talentuar të Ajaxit, Matthijs de Ligt.
Qendërmbrojtësi 19-vjeçar holandez ka befasuar të gjithë me talentin e treguar, por edhe sigurinë në mbrojtjen e Ajaxit.
Paraqitjet e tij të mira prej një lideri kanë bërë që De Ligt të pëlqehet nga shumë skuadra të mëdha evropiane.
De Ligt tashmë është kërkuar nga Manchester City, Barcelona, PSG dhe Juventusi, por garës për transferimin e tij i është bashkuar edhe një tjetër skuadër.
Londinezët e Arsenalit thuhet se janë të gatshëm të përpiqen për ta joshur atë të transferohet në Ligën Premier.
Por, për të qenë i barabartë në garë për reprezentuesin e Holandës, Arsenali do të duhet të kualifikohet në Ligën e Kampionëve për vitit të ardhshëm.
Arsenali gjithashtu thuhet se duhet të shesë gjermanin Mesut Ozil në afatin e ardhshëm të transferimeve për të rritur fondet.
Çmimi i mbrojtësit holandez mendohet të jetë së paku 70 milionë euro.