Tensionet në rritje në kufirin ruso-ukrainas kanë dhënë efektet e para te trupa diplomatike në Kiev. Ndërsa më shumë se 120 000 ushtarë rusë janë të dislokuar në kufirin ukrainas dhe në territorin e Donbass-it, Britania ka filluar të tërheqë gjysmën e stafit të ambasadës së saj në Kiev nga frika e një sulmi të mundshëm ushtarak nga Moska.
Tërheqja e stafit britanik vjen pas njoftimit të Departamentit Amerikan të Shtetit të dielën se do të tërheqë familjarët e stafit diplomatik në Kiev dhe se u ka dhënë mundësinë disa punonjësve të ambasadës të largohen nga Ukraina. “Situata e sigurisë, veçanërisht përgjatë kufijve të Ukrainës, në Krimenë e pushtuar nga Rusia dhe në Donetskun e kontrolluar nga Rusia, është e paparashikueshme dhe mund të përkeqësohet në çdo moment”, thuhet në deklaratën e Departamentit Amerikan të Shtetit.
Në të njëjtën kohë, qeveria amerikane lëshoi një paralajmërim për bashkëqytetarët e saj duke i këshilluar që të mos udhëtojnë në Rusi dhe Ukrainë.
Kievi e kritikoi urdhrin e dhënë nga Uashingtoni për evakuimin e të afërmve të diplomatëve amerikanë nga Ukraina, duke e cilësuar si “të parakohshëm” dhe “të tepruar”. “Me gjithë respektin e duhur për të drejtën e shteteve të huaja për të garantuar sigurinë e misioneve të tyre diplomatike, ne e konsiderojmë këtë masë të marrë nga amerikanët si të parakohshme dhe të tepruar”, tha në një deklaratë zëdhënësi i Ministrisë së Jashtme të Ukrainës, Oleg Nikolenko.
Sipas Bild, tërheqjen e familjarëve të stafit të ambasadës në Kiev po e mendon edhe Gjermania. Ndërkohë, vijon fluksi i municioneve dhe instruktorëve ushtarakë nga vendet e NATO-s. Një ngarkesë e parë me armë, rreth 90 tonë, tashmë ka mbërritur me urdhër të presidentit amerikan Biden.
Përfaqësuesi i Lartë i BE-së, Josep Borrell, nga ana tjetër, tha se “nëse sekretari amerikan i Shtetit Antony Blinken nuk ka diçka të rëndësishme për të na thënë, personeli i BE-së nuk planifikon asnjë evakuim. Ne po vazhdojmë të ndërtojmë një paketë të fortë sanksionesh, por asgjë konkrete nuk do të miratohet sot”.
Gjatë gjithë kësaj jave, duke filluar nga sot, ministrat e Jashtëm të 27 vendeve të BE-së do të takohen në videokonferencë me sekretarin e Shtetit të SHBA-së, Blinken, në kthimin e tij nga negociatat me Moskën në Gjenevë. Sanksione të mundshme në rast pushtimi po diskutohen. Ndërkohë priten edhe bisedime dypalëshe midis Mbretërisë së Bashkuar dhe Rusisë.